Өскемен мен ШҚО Өскемендік және Шүлбі СЭС-сі мемлекет құзырына қайтты
Американдық AES Corporation компаниясына тиесілі болып келген Қазақстанның екі нысаны мемлекеттік меншікке қайтарылды
ҚР Энергетика министрлігінің сайтында хабарланғандай, ағымдағы жылдың 1 қазанында Қазақстан мен американдық AES Corporation компаниясының 1997 жылғы 23 шілдедегі концессиялық келісімшарты аяқталды.
Осыған байланысты, 2 және 3 қазан күндері екі концессиялық «AES Өскемендік СЭС» ЖШС және «AES Шүлбі СЭС» ЖШС нысандары республикалық меншікке өтті. Аталған компаниялардың активінде Өскемендік суэлектрстанциясы және Шүлбі суэлектрстанциялары болған, - дейді мекеме баспасөз қызметі.
Аталғандай, осыдан кейін ҚР Қаржы министрлігінің Мемлекеттік мүлік және жекешелендіру комитеті «AES Өскемендік СЭС» ЖШС және «AES Шүлбі СЭС» ЖШС иелік құқығы мен мемлекеттік үлесті пайдалануды Қазақстанның Энергетика министрлігіне тапсырды. Кейін энергетика министрлігі Асқар Балабатыровты аталған компаниялардың бас диреткоры етіп тағайындады.
