Халқы көп қала мен ауыл басшылары салықты өздері жинайтын болады

Бұл жайында Өскемен қаласында республика бойынша алғаш рет өткізіліп отырған «Ауыл әкімдерінің республикалық форумында» айтылды, деп хабарлайды Устинка LIVE тілшілері. Халқы 2000-нен асатын ауылдар мен ауылдық округтер өз бюджетін өздері реттейді. Мұндай бюджеттің стратегия жайында 2013 жылдан бері ауыл мен аудан басшылары арасында түсіндіріліп келе жатыр. Ал 2018 жылдан бастап бюджетті жоспарлау мен жұмсаудың мұндай тәсілі енгізіле бастамақ. Аталған жылдан бастап тек екі мыңнан астам халқы бар ауылдар мен ауылдық округтер ғана бұл бюджетті жоспарлаудың мұндай тәсілін қолдана бастайды. Ал 2020 жылдан бастап барлық ауыл мен ауылдық округ, кент пен қалалар толықтай аталған жобаға енгізілмек. Қазақстанда жергілікті өзін-өзі басқаруға дербес бюджет енгізу мәселесін талқылауға ҚР Ұлттық Экономика министрі Тимур Сүлейменовтің өзі келіп, аталған жоспардың қалай жүзеге асырылып жатқанын жеткізді. Министр Павлодар мен Шығыс Қазақстан облысы дербес бюджетті енгізуге кірісіп кеткендігін айтады. Ал ауыл бюджетін аудан мәслихаты бекітеді, оған ауыл әкімінің өзі жауапкершілік танытады.