Өскемен мен ШҚО Коммуналды қызметке қарызданған тұрғын зейнеткерлердің ақшасын ұрлаған
Зырян қаласының тұрғыны суық суға бір жыл бойы ақша төлемей, 100 мың теңгеге қарызға кірген.
Қарызын өтеу үшін 25 жастағы қыз зейнеткерлердің үйін тонауға кіріскен. Сондай зейнеткерлердің бірі Вера Николаевна үйде жап-жас қыздың келіп, пәтердің есептегішін жазып алғанын айтады. Кейін жас қыз шөлдегенін айтып, зейнеткерден суық су сұраған.
- Мен суық су әкеліп бердім. Ол кеткен соң, үйде 50 мың теңгем жоқ болып шықты. Ал үйге ол қыздан басқа ешкім келген жоқ. Мен дереу полицияға барып арыз жаздым, - дейді зейнеткер.
Кейін белгілі болғандай, бір қыздың үйден ақша ұрлап кеткенін тағы бір зейнеткер де келіп полицияға айтқан екен. Полиция іске кірісіп, ақша ұрлаушы қызды тауып алған. Қыз барлық кінәні мойындап, қарыз ақшаны қайтару үшін осындай әрекетке барғанын айтқан. Дегенме, қыз бала қарызын жапқан соң, ұрлықты қоямын деп өзіне уәде берген көрінеді.
- Қолды болған әшекей заттар қайтарылып берілді, ақшаның жартысын ұстап жіберіпті, - дейді Зырян аудандық полиция бөлімшесінің басшысы Асель Сулейменова. - «Ұрлық» бабы бойынша қылмыстық іс қозғалуда.
