Облыстың 9 ауруханасына заманауи құрал-жабдықтар сатып алынбақ

Семей мен Өскемен қаласында Ана мен бала орталығына, Өскемендегі №1 қалалық ауруханаға, Семейдегі перинатальды орталыққа, Ұлан, Бесқарағай, Бородулиха, Глубокое ауданында орналасқан аудандық ауруханаларға медициналық құрал-жабдықтар сатып алынбақ. Аталған аурухананың дәрігерлері өздеріне қажетті техникалардың тізімін жасап, басқарма мақұлдауына берген. - Тендер 18 тамыз күні жарияланды. 230 лот бойынша. Өтініштер 11 және 12 қыркүйек күндері қаралып, он күннің ішінде жеңімпаз ұйымдарға хабарлама жіберіледі. Ал 2-3 қазан күндері келісімшартқа қол қойылады, - дейді ШҚО Денсаулық сақтау басқармасының басшысы Марат Шоранов. Ал облыстық онкологиялық аурухананың бас дәрігері Гүлмира Сағидуллина ауруханалардағы медициналық жабдықтардың 70 пайызы ескі екендігін бір жыл жүргізген зерттеу анықтап бергенін айтады. - Компьютерлік томограф істен шыққан. Енді жаңадан келетін жабдық қатерлі ісікті ерте анықтауға көмектеседі. Жаңадан УЗИ-аппарат, химия-терапияға арналған арнайы кереуеттер мен орындықтар, ота жасауға арналған блок әкелінбек, - дейді Гүлмира Сағидуллина. Ендігі кезекте жаңадан сатып алынған құрал-жабдықтардың жағдайын қоғам белсенділері мен тілшілерден құралған жұмыс тобы қадағаламақ.