Өскемен мен ШҚО 1 маусым күні Өскеменде балалар оркестрінің шеруі өтеді
Өскемен қаласында балалар мерекесіне орай 3000 адам қатысқан үлкен шеру өтпек
Биыл Өскемен қаласында Балаларды қорғау күніне арнап бұрын-соңды болмаған мерекелік шараны өткізуді жоспарлап отыр.
- Бұл тұңғыш рет ұйымдастырылғалы отырған республикалық акция, - дейді ШҚО Білім басқармасының қосымша білім беру және дене шынықтыру мәдениеті облыстық орталығының бас маманы Анатолий Симоненко. - Еліміздің балалары 1 маусым күні ауқымды музыкалық ансамбль мен оркестрдің шеруіне қатысады. Әдетте, мұндай шерулер 1 мамыр не 9 мамыр күні өткізіледі. Дегенмен, мұндай шараны балалар күніне де арнап жасағалы отырмыз. ШҚО бойынша 3000 бала қатысысатын балалар шеруі өтпек.
Шеру сағат 10.30-да Астана көшесінен бастап Орджоникидзе көшесі арқылы Республика алаңына қарай бағытталады. Мектеп оқушыларымен қатар шеруге қаламыздың ЖОО мен колледж студенттері де қатысады.
