Семейдің құрылысына миллиардтан артық қаражат бөлінуде

Семейде қалпына келтіру жұмыстары ойдағыдай жүріп жатыр. Семей қаласының солтүстік жағалауындағы алаң толықтай өзгермек. Қала әкімлігінің баспасөз қызметінде Мұхтар Әуезов атындағы даңғылды жөндеу үшін 112 млн. теңге бөлінгені айтылған. Бұл көшедегі тас төсеуіштер, орындықтар, қоқыс салғыштар ауыстырылып, көше бойы абаттандырылады, жазушының ескерткіші жөнделеді. Балалар алаңы да салынады. Қаланың вокзал алды алаңы да қалпына келтірілмек. Бұған қала бюджетінен 80 млн. теңге жұмсалады. Қала басшылығы Ертіс өзені жағалауын да жөндеуге көңіл бөлген екен. - Жағалау жұмыстарына 348 млн. теңге қарастырылған. Жаңа тас төсегіштер салынады, субұрқақ қайта қалпына келтіріледі, жарық орналастырылады, балалар алаңы салынады, шырша, гүлшоқтары егіледі, - делінген Семей әкімінің баспасөз қызметінде. Қаланың барлық орталық көшелеріне гүл егіледі. Жергілік билік балалардың ойнауына арналған 10 алаңқай салуды жоспарлап отыр. Бұл жұмыстардың барлығына қала бюджетінен 700 млн. теңге бөлінсе, қосымша облыс бюджетінен 600 млн. теңге бөлінеді екен.