Өскеменде ұры-қарылық көбеюде

2017 жылдың алғашқы жартысында орын алған құқықбұзушылықтар былтырғы жылдың сәйкес мерзіміне шаққанда, салыстырмалы түрде аз болғанымен облыста жасалатын қылмыстардың 60%-ын ұрлық құрап отыр.

ШҚО прокуратурасы хабарлап отырғандай, ұрлықшылар көбінесе ұялы телефондарды ұрлаумен айналысады. Тұрғындардың өздері де гаджеттеріне немқұрайлы қарайды. Қоғамдық көліктерде, көңіл көтеру орындарында қалта телефондар көп жоғалады. Сонымен қатар тұрғындардан сөйлесу үшін сұрап алған телефондарын алып қашқан ұрылардың саны көп болып отыр.

Ұялы телефондармен байланысты алаяқтық әрекеттер де кең өріс алған: ұялы телефонын сатқысы келген «әлдекім» оны сату жөнінде хабарламалар іліп, кейін сатып алушыдан алғашқы жарна сұрайды. «Жақсы» қалта телефонын сатып алғысы келген тұтынушы жарнаны есепшотқа лақтырады. Жарнаны алған қылмыскер хабарламаны өшіріп жоқ болады.

Прокуратура тұрғындардың өз затына мұқият қарап, абай болуын өтінеді.