Шымкент тұрғыны прокуратура мекемесінің алдында өз-өзін өртеп жіберді

 Өмірімен қош айтыспақ болған кәсіпкер Нұркен Айнабеков алаяқтық үшін айыпталуда. 2016 жылдың 15 мамырында оның ісі бойынша тергеу басталып, 9 қарашада айыптау актісімен қылмыстық іс прокуратураға жіберілген, кейін сотқа жеткен.

Болған оқиғаға дейін Айнабеков журналистерге бірнеше жыл бұрын облыстық әкімдік тапсырысымен медициналық амбулаторияның құрылысын алғанын айтқан. Кәсіпкер міндетін орындағанына қарамастан, онымен ешкім есептеспеген. Ол полицияға, прокуратураға, мемлекеттік кірістер басқармасына шағымданған, бірақ осыдан кейін жағдай шиеленісе түскен. Оған жала жабу мен алаяқтықты қосқанда төрт бап бойынша қылмыстық іс қозғалған. Ақыры 22 желтоқсанда прокуратура мекемесінің алдында еркек үстіне бензин құйып өз-өзін өртеп жіберген. Қазір ол денесіне алған 60 пайыздық күйікпен ауруханада жатыр. Полицияда бұл оқиғаға қатысты қылмыстық іс қозғалды.