Өскемен мен ШҚО ШҚО полицейлері инсульт алған азаматты шұғыл ауруханаға жеткізді
"Өскемен – Риддер" тас жолы бойында келе жатқан көлік жолаушысының денсаулығы күрт нашарлап, инсульт белгілері байқалған
Көлік жүргізушісі патрульдік полиция батальонының экипажынан көмек сұраған, деп хабарлайды Устинка LIVE тілшісі.
"Өскемен – Риддер" тас жолының 90-шы шақырымында қызмет атқару кезінде патрульдік полиция батальонының экипажы — полиция аға лейтенанттары Олегұлы Азамат пен Шаяхметов Әлішер жол жиегіне тоқтаған автокөлікті байқаған. Көлік жүргізушісі салонда 1988 жылы туған азаматтың жағдайы нашарлап, инсульт белгілері бар деп полицейлерден көмек сұраған, - деп мәлімеді ШҚО ПД баспасөз қызметі. - Тәртіп сақшылары науқас отырған көлікке ілесіп жүрген, бірақ жолда ол көлік бұзылып, келесі нарядты шақыртуға тура келген.
Полицейлер ақпаратты дереу жақын маңдағы келесі нарядқа — құрамында полиция аға лейтенанттары Асылбек Базылбеков пен Әлішер Ачилов бар ПА-466 экипажына хабарлаған.
Оқиға орнына жеткен екінші экипаж науқасты қызметтік автокөлікке отырғызып, барынша жылдам әрі қауіпсіздікті сақтай отырып, медициналық мекемеге жеткізді.
Екі экипаждың үйлесімді іс-қимылының арқасында азамат Өскемен қаласындағы №1 қалалық ауруханаға уақытылы жеткізіліп, оған қажетті медициналық көмек көрсетілді.
ШҚО Полиция департаменті жолда тосын жағдайлар орын алғанда дереу жақын маңдағы полиция экипажына немесе 102 телефонына хабарлау керектігі туралы еске салады.