Өскемен мен ШҚО Өскеменде жер үйде пеш жарылып, бала жарақаттанды
Бүгін таңертең жарықтың өшіп қалуына байланысты 28-ші шағын аудандағы жер үйлердің бірінде қызып тұрған пеш жарылған
Пеш қазандығы жарылуы салдарынан бөлмелердің арасын бөліп тұрған қабырға құлап, 8 жастағы бала жарақат алған, деп хабарлайды Устинка LIVE тілшісі.
Облыстық денсаулық сақтау басқармасы 2017 жылы туған баланы Ана мен бала орталығының дәрігерлері тексеріп, үйіне жібергенін мәлімдеді. Бала емді тұрғылықты мекенжайы бойынша амбулаторияда қабылдайды.
Оқыс оқиға жайлы хабардан соң қала әкімі Алмат Ақышов барып, үй иелеріне қолдау көрсетті.
Зардап шеккен отбасыға мемлекет тарапынан уақытша тұрғын үй ұсынылады, - деп мәлімдеді Өскемен қалалық әкімдігі. - Ал ықшам ауданның электр желісіндегі мәселе 10 күн ішінде толық шешілетін болады. Қазіргі уақытта жарылыс кезінде үйде болған адамдар медициналық тексеруден өтуде. Алдын ала мәлімет бойынша, адам өміріне қауіп төндіретін зақымдар анықталған жоқ. Жағдай тұрақты бақылауда.