Өскемен мен ШҚО ШҚО-да оқушылар арасында садақ атудан жарыс өтеді
"Жас мерген" жай ғана жарыс емес – алғаш рет өтетін облыстық телетурнир
Турнирді ШҚО әкімдігі және ШҚО Спорт басқармасының қолдауымен "ALTAI" телеарнасы мен "Керемет садақ ату" орталығы бірлесіп ұйымдастырмақ, деп хабарлайды Устинка LIVE тілшісі.
Садақ ату – ұлтымызда аса дәріптелген әрі ерекше мән берілетін спорт түрі. Ол адамды мергендікке үйретумен қатар, лезде дұрыс, нақты шешім қабылдауға, ой мен істің бір жерде тоғысуына тәрбиелейді. Бұл жауапкершілікті арттыратын спорт. Балалар үнемі осы спорт түрімен айналысса, әрдайым жеңіске талпынатын, намысшыл, рухты болып өседі.
Турнир ҚР Туризм және спорт министрлігі және еліміздегі Ұлттық спорт қауымдастығы бекіткен "Дәстүрлі садақ ату" спорт түрінің ережесіне сәйкес өткізіледі. Жарысқа 9-10 сыныпта оқитын, жалпы саны 80-нен астам оқушы қатысуға ниет білдірген. Олар жекелей сында "Қалқан" нысанасы бойынша бақ сынайды. Жартылай финал мен финалда жамбы ату бойынша сынға түседі, - деп мәлімдеді ұйымдастырушылар.
Жарыстың салтанатты ашылуы бүгін, 29 қазан сағат 12.00-де "NURORDA" мектеп-лицейінде өтеді (Өтепов көш., 22/1).