Өскемен мен ШҚО ШҚО полициясы айыппұл төлемей жүрген борышкерлерді жол үстінен ұстамақ
Бүгіннен бастап облыс аумағында "Борышкер" жедел профилактикалық шарасы басталды
8-10 қыркүйек аралығында облыс жолдарында полиция қызметкерлерінің, прокуратура өкілдерінің, Жеке сот орындаушыларының өңірлік палатасы қызметкерлерінің қатысуымен рейдтер ұйымдастырылады, деп хабарлайды Устинка LIVE тілшісі.
Негізгі мақсат – айыппұл төлеуден жалтарып жүрген азаматтарды анықтау.
ШҚО полициясы еске салады: Қазақстан Республикасы Әкімшілік құқық бұзушылық туралы кодексінің 810-бабына сәйкес, азамат хаттама толтырылған күннен бастап 7 тәулік ішінде айыппұл сомасының тек 50 пайызын қысқартылған тәртіпте төлеуге құқылы. Егер бұл құқық пайдаланылмаса, айыппұл толық көлемде, бірақ 30 тәуліктен кешіктірмей ерікті түрде төленуі тиіс.
Аталған мерзім өткеннен кейін материалдар өндіріп алу үшін мәжбүрлеп орындату мақсатында атқарушы органдарға жолданады.