Өскеменге "Әзірет Сұлтан" ұлттық тарихи-мәдени музей-қорығының жәдігерлері жетті

Көрме 19 тамыздан 13 қыркүйекке дейін тұрады, деп хабарлайды Устинка LIVE тілшісі.

19 тамыз күні сағат 11.00-де Шығыс Қазақстан облыстық тарихи-өлкетану музейінде "Түркістан - мыңжылдықтар сәулесі" атты көрме ашылады. Бұл көрме Қожа Ахмет Ясауи ілімінің ғасырлар бойы адамдардың жүрегін нұрландырып, ақиқат нұрына жетелеген рухани шамшырақ болғанын паш етеді.

Экспозицияда екі жарық символы көрініс табады: рухани жарық – Ясауидің, оның шәкірттері мен ізбасарларының қолжазба кітаптары арқылы; және заттық жарық – XII–XIX ғасырлардағы Түркістан өңірінде жасалған керамикалық және қола шырағдандар арқылы. Осы екі жарықтың тоғысуы көрерменді өткен ғасырлардағы рухани білімнің және мәдени мұраның шынайы сәулесімен қауыштырады, - деп мәлімдеді Шығыс Қазақстан облыстық тарихи-өлкетану музейінің баспасөз қызметі. - Көрмеде Яссауидің "Диуани хикмет", "Миратул-қулуб", "Пақырнама", "Рисала-и дар адаби тариқат" сияқты еңбектерімен қатар, оның шәкірттері мен Яссауи ілімінің көрнекті өкілдерінің сирек қолжазбалары мен еңбектері, сондай-ақ сол дәуірге тиесілі жәдігерлер ұсынылады. Экспозиция тарихи деректер мен поэтикалық бейнелерді ұштастыра отырып, Ясауи нұрының тек метафора емес, ұрпақ жүрегінде ғасырлар бойы сөнбеген шынайы жарық екенін айғақтайды.