Өскемен мен ШҚО ШҚО-дағы көпбалалы аналарға "Алтын алқа" және "Күміс алқа" табысталды
Шығыс Қазақстанда төрт және одан да көп баласы бар 13 мыңға жуық көпбалалы ана тұрады
Облыс әкімі Нұрымбет Сақтағанов өңірдегі көпбалалы аналармен кездесіп, оларды толғандырған мәселелер мен ұсыныстарын тыңдады, деп хабарлайды Устинка LIVE тілшісі.
ШҚО әкімі Нұрымбет Сақтағанов өңірдің көпбалалы отбасылармен кездесуді аналарға алғыс айтудан бастады. Әкімдікте өткен дөңгелек үстелде алты және одан да көп балаларды тәрбиелеп отырған аналар бейресми жағдайда өздерін толғандыратын мәселелерді талқылап, өз ұсыныстарын айтты. Өз кезегінде өңір басшысы аналар баланы ғана емес, күллі ұлтты тәрбиелейтінін тілге тиек етті.
⠀ҚР Президенті Қасым-Жомарт Тоқаевтың атынан өңірдің әлеуметтік дамуына, ұрпақты тәрбиелеуге және отбасылық құндылықтарды нығайтуға қосқан үлесі үшін көпбалалы аналар "Алтын алқа" және "Күміс алқамен" марапатталды.
⠀⠀Бұл халық пен мемлекет тарапынан әр ананың еңбегін жоғары бағалауының белгісі. Аналық жылулық – берік қоғамның негізі әрі символы, ал өмірлік сабақтарыңыз – ұрпақ игілігі. Сіздер елдің демографиялық өсуіне елеулі үлес қосып қана қоймай, өскелең ұрпақты еңбекқор, білімді және патриот етіп тәрбиелейсіздер, - деді Нұрымбет Сақтағанов.
Бүгінде ШҚО-да төрт және одан да көп баласы бар 13 мыңға жуық көпбалалы ана тұрады. Олардың ішінде 1442-сі "Алтын алқа" және 2900-ге жуығы "Күміс алқа" алқаларымен марапатталды. Олар сондай-ақ біржолғы және ай сайынғы мемлекеттік жәрдемақы алуға, салықтардың кейбір түрлерінен босатылуға және 53 жасқа толғаннан кейін зейнетақы төлемдерін алуға құқылы.