Өскемен мен ШҚО Өскемендік оқушы Президент қолынан марапат алды
Батыр Ержанұлы Өскемен қаласындағы химия-биология бағытындағы Назарбаев Зияткерлік мектебінде оқиды
Ол - халықаралық білім додаларының жеңімпазы, деп хабарлайды Устинка LIVE тілшісі.
Президент Қасым-Жомарт Тоқаев еліміздің атын халықаралық аренада танытып жүрген жас зияткерлерді қабылдап, олардың табандылығы мен білімге деген шексіз ұмтылысын жоғары бағалады. Салтанатты рәсімге 24 үздік оқушы – 4 алтын, 11 күміс және 9 қола медаль иегерлері қатысты. Олардың қатарында Батыр Ержанұлы да бар.
Батырдың соңғы бір жылдағы жеңістері – еліміз үшін мақтаныш, шәкірттеріміз үшін шабыт. Ол Ресейдің Сочи қаласында өткен халықаралық олимпиадада алтын медаль иеленіп, жуырда Филиппиннің Кесон-Сити қаласында ұйымдастырылған биологиядан IBO-2025 беделді халықаралық олимпиадасында қола медальды қанжығасына байлады. Бұл жетістіктер – оның білім мен ғылым жолындағы қажырлы еңбегінің, ұстаздарының кәсіби шеберлігінің және ата-анасының шексіз қолдауының жемісі, - деп мәлімдеді НЗМ баспасөз қызметі.
