Өскемен мен ШҚО ШҚТУ-дың бұрынғы басшысы мемлекет үлесін жекешелендіріп алған
Қаржы мониторингі агенттігінің ШҚО бойынша департаменті мемлекет қатысатын үлесті заңсыз иеліктен шығару фактісі бойынша тергеуді аяқтады
"Технопарк "Алтай" ЖШС, 8 мың шаршы метрлік ғимарат пен 1,3 га жер телімі Д. Серікбаев атындағы ШҚТУ-ға қайтарылды, деп хабарлайды Устинка LIVE тілшісі.
Д. Серікбаев атындағы Шығыс Қазақстан техникалық университеті – елдегі жетекші жоғары оқу орындарының бірі. Университет металлургия, машина жасау, энергетика, медициналық техника және басқа да салалар үшін мамандар даярлаумен айналысады. Оның құрамында 17 ғылыми орталық, зертхана және ғылыми-өндірістік алаң жұмыс істейді.
Алайда 2018–2020 жылдары университеттің бұрынғы басшылығы "Технопарк "Алтай" ЖШС-ның жарғылық капиталындағы 78% мемлекеттік мажоритарлық үлесті заңсыз түрде жекеменшікке өткізген, - деп мәлімдеді Қаржы мониторингі агенттігінің ШҚО бойынша департаменті. - Мемлекет басшысының заңсыз шығарылған активтерді қайтару жөніндегі тапсырмасын орындау аясында университетке жалпы құны 1,5 млрд теңге болатын "Технопарк "Алтай" ЖШС-дегі 100% үлес, 8 мың шаршы метрлік ғимарат пен 1,3 га жер телімі қайтарылды.
Қайтарылған активтер зертханалық және оқу базаларын орналастыруға, сондай-ақ травматология, ортопедия және онкологиялық протездеуге арналған медициналық өнімдер шығаратын инновациялық кластерді дамытуға пайдаланылатын болады.