Өскемен мен ШҚО Өскемендегі көпқабатты үйлер қазақтың көк байрағымен безендірілді
Мемлекеттік рәміздер күніне орай шығысқазақстандық белсенді жастар патриоттық акция өткізді
Бүгін, 4 маусым – Мемлекеттік рәміздер күні, деп хабарлайды Устинка LIVE тілшісі.
Осыған орай "AMANAT" партиясы Шығыс Қазақстан облыстық филиалы жанындағы "Жастар Рухы" ЖҚ ШҚО филиалының белсенді жастары #МеніңЕлімМеніңТуым атты патриоттық акция өткізді.
Акция аясында шығыстық "Жастар Рухы" мүшелері қаламыздағы биік ғимараттарды қазақтың көк байрағымен безендіріп, ел рухын көтеретін ерекше атмосфера қалыптастырды.
Біз бұл бастаманы жастардың бойында елжандылық пен патриоттық сезімді арттыру мақсатында ұйымдастырдық. Мемлекеттік рәміздер – бұл тек белгілер емес, олар – біздің өткеніміз, бүгініміз және жарқын болашағымыз. Осындай акциялар арқылы біз жастарды елін, жерін құрметтеуге, Туға тағзым етуге баулимыз, - дейді "Жастар Рухы" ЖҚ ШҚО филиалының төрағасы Қорлан Туғанбаева.
Мемлекеттік Ту, Елтаңба және Әнұран – әр қазақтың мақтанышы, тәуелсіз еліміздің басты құндылықтары. Бұл рәміздер – халқымыздың бірлігі мен болашағына деген сенімінің символы.
