Өскемен мен ШҚО Жазғы каникулда оқушылар ШҚО-ның киелі орындарына барады
Биыл Шығыс Қазақстан облысындағы жалпы білім беру мекемелерінің 7-8-сынып оқушыларына арналған "Киелі Шығыс" жобасы қолға алынды
Интеллектуалдық байқаудан өткен үздік оқушылар жазғы демалыста облыстың киелі орындарына жіберіледі, деп хабарлайды Устинка LIVE тілшісі.
Сәуір айында онлайн платформада барлық аудан мен қала мектептеріндегі 7-8-сынып оқушылары арасында "Киелі Шығыс" интеллектуалдық конкурсы өтті. Конкурсқа 6 144 оқушысы қатысып, өңірлік компоненттерге байланысты "Қазақстан тарихы", "География", "Биология", "Әдебиет" пәндерінен тест тапсырмаларын орындады. Енді конкурстың жеңімпазы болған 200 оқушы маусым айында 4 бағыт бойынша оқу-танымдық турларға қатысады: Берел (Катонқарағай ауданы), Қиын-Керіш (Күршім ауданы), Таулы Үлбі – Риддер қаласы, Сібе көлдері – Марин жартасы, - деп мәлімдеді ШҚО білім басқармасы.
Балалар Шығыс Қазақстанның мұражайларын, қорықтарын, мәдени-тарихи ескерткіштерін, киелі орындарын, табиғи ұлттық парктерін тамашалай алады.
Оқу-танымдық турлар бағдарламасына экскурсиялар, шеберлік сабақтары және туризм негіздері бойынша оқу-практикалық сабақтар енгізілген. Сондай-ақ туған өлкенің дәстүрлері, мәдениеті мен мұрасын зерттеу көзделген.
Оқушыларға ұйымдастырушылар, гид-экскурсия жүргізушілер, туризм бойынша кәсіби жаттықтырушылар, мұғалімдер, медицина және полиция қызметкерлері ілесіп жүреді.