WorldSkills Shygys-2025 аймақтық чемпионатының жеңімпаздары белгілі болды

Байқауға 30-дан астам колледж өкілі қатысты, деп хабарлайды Устинка LIVE тілшісі.

Марапаттау рәсіміне ШҚО әкімі Нұрымбет Сақтағанов, ШҚО әкімінің орынбасары Ербол Нұрғалиев, облыстық білім басқармасының басшысы Инесса Чернышева, "Talap" коммерциялық емес акционерлік қоғамының өкілдері, құзыреттер бойынша бас сарапшылар, білім беру ұйымдарының басшылары мен серіктес жұмыс берушілер қатысты.

100-ден астам сарапшылар мен тәуелсіз сарапшылар төрелік еткен чемпионатқа қатысқан 300-ге жуық жас 40 құзырет бойынша кәсіби шеберліктерін сынап, өзара сайысқа түсті. Қатысушылардың дағдыларын әділ бағалау мен ашықтық үшін халықаралық стандарттарға сәйкес бағалау жүйесі қолданылды.

Ұйымдастырушылардың айтуынша, WorldSkills Shygys өткізу – қазіргі заман талабы мен еңбек нарығындағы сұранысқа сай білікті жұмысшыларды даярлауға бағытталған маңызды қадам. Чемпионатқа қатысқан жастар техникалық және кәсіптік білім беру сапасының артып келе жатқанын өз өнерлерімен көрсеткен бәсекеге қабілетті мамандар.

Әр құзырет бойынша жеңімпаздар мен жүлдегерлер анықталып, оларға медальдар мен дипломдар табысталды. Сонымен қатар, жоғары нәтиже көрсеткен командаға оқу үдерісінде пайдалану үшін облыс әкімінің атынан интерактивті тақта табысталды.