Өскемен мен ШҚО Биыл ШҚО-дағы "Қонақжай отбасыларға" 140 бала барады
Облыста жүз мыңға жуық бала жазғы демалыс, сауықтыру және жұмыспен қамту шараларымен қамтылады
Бұл туралы облыс әкімдігіндегі отырыста білім басқармасының басшысы Инесса Чернышова баяндады, деп хабарлайды Устинка LIVE тілшісі.
Жоспар бойынша 99,9% (93 564) оқушы жазғы демалыс, сауықтыру және жұмыспен қамту шараларымен қамтылады, оның ішінде көпбалалы және аз қамтылған отбасылардан шыққан балалардың 100% (9 056) қамтылмақ. Жазғы демалыс кезінде 11 қала сыртындағы лагерь (8 мемлекеттік және 3 жекеменшік) 8575 оқушыны қабылдайды; тамақпен қамтамасыз етілген 270 мектеп жанындағы лагерь – 23120 баланы қамтиды; 204 тамақсыз бейінді алаңдарда қосымша білім беру ұйымдары мен аула клубтарында үйірмелер, секциялар, экскурсиялар және басқа да іс-шаралар өткізіліп, 61 869 астам оқушы қамтылады, - деді басқарма басшысы.
Сонымен қатар, балалар Алматы қаласындағы "Бөбек" және Щучинск пен Қонаев қалаларындағы "Балдәурен" ұлттық білім беру және сауықтыру орталықтарында демалады. Жаз мезгілінде 7-8 сынып оқушыларына арналған әскери-спорттық лагерь Самар ауданындағы "Балауса" лагерінің базасында жұмысын жалғастырады.
Жазғы демалыс кезінде "Қонақжай отбасы" жобасы жалғасын табады. Биыл жоба географиясы 3 ауданның 5 елді мекеніне дейін кеңейіп, 62 отбасы тартылады, 140 бала қамтылады. Жоба балаларды қазақ тіліне толық тілдік ортада практикалық үйретуді көздейді.