Өскемен мен ШҚО Ұлттық ұландықтар Жеңістің 80 жылдығына орай ерекше челлендж бастады
Мерейлі мереке аясында "Шығыс" өңірлік қолбасшылығына қарасты №5518 әскери бөлімінің жеке құрамы бес шақырымдық қашықтықты жүгіріп өтті
Өскемендіктер челлендж эстафетасын павлодарлық сарбаздарға жолдады, деп хабарлайды Устинка LIVE тілшісі.
Бұл бастама арқылы Ұлттық ұланның сарбаздары Ұлы Отан соғысы ардагерлеріне құрмет көрсетіп, елінің тыныштығы мен болашағы үшін күрескен батырлардың ерлігін ұлықтады.
Спорт – денсаулық кепілі. Спорт арқылы Ұлы Отан соғысына қатысқан ардагерлерге құрметімізді білдіру мен үшін ерекше ілтипат болып табылады. Батыр бабаларымыз елі үшін жанын пида етіп, аяусыз ерлік үлгісін көрсете білді. Ұландықтар санасында майдангерлер ерлігі жаңғыра бермек, - дейді №5518 әскери бөлімінің қатардағы жауынгері Нұрбек Асылханов.
Әскери бөлімнің жеке құрамы бұл шараны челлендж ретінде Павлодар қаласындағы №5512 әскери бөліміне жолдап, эстафетаны жалғастыруға шақырды. Бұл бастама барша Ұлттық ұлан құрылымдары арасында кеңінен таралып, патриоттық рухты нығайтудың жарқын үлгісіне айналмақ.