Өскеменде француз киносының фестивалі өтеді

Фестивальді Францияның Қазақстандағы елшілігі, Француз институты және "Юбилейный" кинотеатры бірлесіп ұйымдастыруда, деп хабарлайды Устинка LIVE тілшісі.

Ертең сағат 18.00-де өтетін фестивальдің ресми ашылуына Францияның Қазақстандағы Төтенше және өкілетті елшісі Сильван Гиоге және Франция Елшілігінің мәдениет жөніндегі атташесі Клара Мейзен қатысады.

Ресми бөлімнен кейін көрермендер алғашқы фильмді тамашалайды — бұл бір аптаға созылатын кино мерекесінің бастамасы болмақ.

Фестиваль бағдарламасы бойынша 7 фильм көрсетіледі - 5 көркем және 2 анимациялық кинотуынды. Халықаралық кинофестивальдерде жоғары баға алған, әлем көрермендерінің ықыласына бөленген туындылардың жанры әртүрлі: комедия, драма, отбасылық және авторлық фильмдер.

Кино көрсетілімдері күн сайын кешкі уақытта өтеді. Барлық фильмдер түпнұсқа француз тілінде, орысша субтитрмен ұсынылады. Бұл көрермендерге француз тілінің әуезін естіп, нағыз француз киносының атмосферасын сезінуге жол ашады.