Өскемен мен ШҚО Өскеменде қала ішінде заңсыз қоқыс үйіндісі пайда болған
Бажов көшесі мен саяжайлар арасындағы алаңға бәзбіреулер қыс бойы қар төккен, қазір қар ерігенде оның астынан тау-тау болып үйілген қоқыс шыққан
Бұл туралы жергілікті тұрғын әлеуметтік желіге жариялаған болатын, деп хабарлайды Устинка LIVE тілшісі.
Бұл Бажов көшесі мен саяжай учаскелерінің арасындағы бос жатқан жер. Бұрын әдемі алқап еді, қазір қоқыс алаңына айналды. Биыл бірінші рет қаладан келген көліктер қар төкті. Оған рұқсат бар-жоғын анықтап ешкімнен біле алмадым. Қазір қар ерігенде қармен бірге сол кезде шлак, дөңгелектер, тағы да басқа қоқыс төгілгені белгілі болды. Бұл дұрыс па? Бүкіл елде "Таза Қазақстан" акциясы жүріп жатқанда біздегі жағдай осындай, - деп жазды желі қолданушысы.
Осы видеолардан кейін ШҚО бойынша экология департаменті тексеріс жүргізді.
Әлеуметтік желілерде Өскемен қаласының шетіндегі Бажов көшесі мен саяжай алаптарының арасында орналасқан рұқсат етілмеген қоқыс үйіндісі туралы ақпарат жарияланды. Осыған байланысты ШҚО бойынша экология департаменті Табиғат қорғау полициясымен бірлесіп тексеріс жүргізді. Тексеру барысында әлеуметтік желілерде жарияланған ақпарат расталды, - деп мәлімдеді Экология департаментінің баспасөз қызметі.
Осы факті бойынша Экология департаментінің экологиялық инспекторлары Өскемен қаласының тұрғын үй-коммуналдық шаруашылық, жолаушылар көлігі және автомобиль жолдары бөлімінен 2025 жылдың 8 сәуіріне дейін анықталған қоқыс үйінділерін жоюды талап етті. Талаптар белгіленген мерзімде орындалмаған жағдайда Экология департаменті жергілікті атқарушы органның жауапты лауазымды тұлғаларына қатысты әкімшілік ықпал ету шараларын қабылдайтын болады.
Экология департаменті жағдайды бақылауда ұстайды. Рұқсат етілмеген қоқыс үйінділерін анықтау және жою жұмыстары елдегі экологиялық жағдайды жақсартуға бағытталған "Таза Қазақстан" акциясының аясында жүргізілуде, - деп мәлімдеді департаменттегілер. -Департамент қоршаған ортаны қорғау саласындағы бұзушылықтарды анықтау және жолын кесу бойынша белсенді қызметін жалғастыруда, сондай-ақ тұрғындар мен ұйымдарды экология және көріктендіру мәселелеріне жауапкершілікпен қарауға шақырады.