Өскемен мен ШҚО Өскемендегі Абай мен Қабанбай ескерткіштерін күтіп ұстауға ешкім жауапты емес
Өйткені Республика алаңындағы Абай Құнанбайұлының ескерткіші де, Шығыс ауылына барар жолда тұрған Қабанбай батыр ескерткіші де ешбір мекеменің есебіне алынбаған
Бұл туралы Өскемен қаласының әкімі Алмат Ақышов айтты, деп хабарлайды Устинка LIVE тілшісі.
Әкім биыл екі ескерткіш қалалық әкімдік балансына алынатынын айтты.
Бұл мәселе Ахмер ауылының тұрғындарымен кездесу кезінде көтерілді. Азаматтардың бірі қала шетіндегі Қабанбай батыр ескерткішінің қараусыз, күтімсіз тұрғанына алаңдаушылық білдірді.
Қалаға кіре берісте тұрған ескерткіш қараусыз тұр. Жарықшамдары дұрыс жанбайды. Маңайын көгалдандыру жоспарда бар ма? – деді тұрғын.
Осы орайда Өскемен қаласының әкімі Қабанбай батыр ескерткішінің ешкімнің балансында тұрмағанын айтты.
Бір қызығы – бұл ескерткіш те, орталық алаңдағы Абай атамыздың ескерткіші де ешкімнің есебінде емес. Оларды ешкім күтіп ұстау жұмыстарын жүргізбейді. Енді ескерткіштерді қалалық әкімдік өз есебіне алады, өзіміз күтіп ұстайтын боламыз. Көшеттер отырғызып, тазалығын назарда ұстаймыз, - деді Алмат Ақышов.