Өскемен мен ШҚО Биыл Ахмердің көшелерін жөндеуге қаржы қарастырылмаған
Өскемен қаласының әкімі тұрғындармен кездесу кезінде биыл Ахмер ауылына бір жылы аялдама орнату ғана жоспарланғанын айтты
Дегенмен Нұрғалиев көшесіне асфальт төсеу үшін қаржы табуға уәде берді, деп хабарлайды Устинка LIVE тілшісі.
Ауыл тұрғындарын мазалайтын басты мәселе – жол жөндеу, жарық тарту, балабақшада орын жетіспеушілігі және емхананың жоқтығы, жолаушылар тасымалын ұйымдастыру. Одан өзге, бұл ауданда бірнеше саяжай бірлестіктері орын тепген, тіпті қазіргі таңда кәдімгі елді мекенге айналған. Өйткені онда негізінен ауыл-аймақтан көшіп келген өзіміздің қаракөздер үй салып, қысы-жазы тұрып жатыр. Әлбетте бұл саяжайларда жол да дұрыс емес, жарық пен су да жоқ.
Қазақстан бойынша саяжай бірлестіктерінің саны ең көп қала – Өскемен. Өскемен қаласының өзінде 164 саяжай бірлестіктері бар. Әрине ондағы халық жол, су, жарық сынды мәселелерімен әкімдікке жүгінеді. Алайда заң бойынша қалалық әкімдік бюджетінен саяжай бірлестіктеріндегі мәселелерді шешуге қаржы бөлуге болмайды. Бақылаушы органдар бюджет қаражатын негізсіз пайдалану деп әкімдікке айыппұл салады. Халыққа көмектесу үшін әкімдік соңғы жылдары басқа да жолдарын қарастырып, амалдап жүргені жасырын емес. Бұл жолы да шаһар басшысы Алмат Ақышов саяжай бірлестіктерінің біріне екі жерден құдық қазып, жолына қиыршық тас төсеуге көмектесуге уәде етті.
Одан өзге, ауыл тұрғындарының сұрауы бойынша 50 орындық балабақша ашылып, балалар ойын алаңдарын салып, жылы аялдама орнатылатынын айтты.
Жоспар бойынша Ахмер ауылында бірқатар жұмыстар былтыр атқарылған екен, биылға тек 1 жылы аялдама, 1 жай аялдамаға ғана бюджет бөлінген. Сондықтан ауыл тұрғындарымен кездесіп, өзекті мәселелерін тыңдап, шешуге ниеттіміз. Қ. Нұрғалиев көшесінің жағдайын өз көзіммен көрдім. Көктемде еріген қар суы жайылады, арық қазуға тапсырма бердім. Сондай-ақ, бұл көшеге биыл асфальт төсеуге қаржы табамын, - деді Өскемен қаласының әкімі Алмат Ақышов.
Сондай-ақ, әкім Ахмер ауылына демалыс орны қажет екенін атап өтіп, қоластындағыларға аймақты барлап, қолайлы орын табуға тапсырма берген.
Естуімше, Ахмер ауылының маңында қолдан жасалған көлшік бар екен. Мамандарға сол маңайды барлап көруді тапсырдым. Өйткені Ахмер ауылының тұрғындарына өз демалыс аймағы керек, - деді Алмат Талғатұлы.
Одан өзге, халық бас қосатын, қариялар шахмат, дойбы ойнай алатын мәдени ошақ ашып беруге де уәде етті.