Өскемен мен ШҚО Ұлан ауданында жоғалған ер адам 13 сағаттан соң табылды
Психикалық сырқаты бар ер адам бағытынан жаңылған
Оны полиция қызметкерлерімен бірге ауыл әкімі мен тұрғындар да іздеген, деп хабарлайды Устинка LIVE тілшісі.
Ұлан ауданының полиция бөліміне Желдіөзек ауылының тұрғыны қоңырау шалып, жоғалып кеткен күйеуін іздеуге көмектесуін өтінген. Әйелдің айтуынша, психикалық сырқаты бар ер адам кешкісін үйден шығып кетіп, артына қайта оралмаған, - деп хабарлайды ШҚО ПД бапасөз қызметі. - Кезекші инспектор жедел түрде арызды тіркеп, іздестіру жұмыстарын ұйымдастырды. Іздеу тобына жедел тергеу қызметкерлері, кинологтар мен қызметтік иттер, криминалдық полиция мамандары, учаскелік инспекторлар, Аблакетка ауылдық округінің әкімі Арсылан Ағланбеков және ауыл тұрғындары жұмылдырылды.
Түнгі уақытта іздеу жұмыстары қиындап, арнайы дрондар мен қолға ұстайтын жылу камералары пайдаланылған. Ауылдық округте көп жылдан бері қызмет етіп келе жатқан, жергілікті жерді жақсы білетін учаскелік инспектор Мирас Тоқтарұлы мен Аблакетка ауылдық округінің әкімі жоғалған азаматты 13 сағаттан кейін ауылдан 7 шақырым жердегі орман жиегінен тапты. Бағытынан жаңылған ол абыржыған күйде болған.