Өскемен мен ШҚО Ахмер тұрғындары жаңадан салынып жатқан емхананың сапасына сенбейді
Тұрғындардың өтініші бойынша құрылыс басына арнайы мамандары барып, тексеріс жүргізеді
Өскемен қаласының әкімі Алмат Ақышов Ахмер ауылының тұрғындарымен кездесіп, елді мекеннің дамуына қатысты өзекті мәселелерді талқылады, деп хабарлайды Устинка LIVE тілшісі.
Ахмер ауылында 3 мыңға жуық халық тұрады, жыл сайын ауыл-аймақтан көшіп келіп, үй салып жатқандар қанша. Шағын ауданға өз емханасы мен мемлекеттік балабақша қажет. Мұндағылар қазір Меновное ауылында емханаға қаралады.
Былтыр қараша айында №49 мектептің артында дәрігердік амбулатория құрылысы басталған. Мұны көптен күткен ауыл тұрғындары құрылыс сапасына күмәндануда.
Емхана саз батпақтың үстінен, арзан кірпіштен салынып жатыр. Еріген қар суы басып қалды, қазір мектептің арты батпақ, аяқ алып жүру мүмкін емес, - дейді тұрғындар.
Нысанды "Oskemen Build" ЖШС салып жатыр. Бұл дәрігерлік амбулатория бір ауысымда 25 адамды қабылдамақ. Құрылыс 2025 жылдың екінші тоқсанында (қаржыландыруға байланыс) аяқталады деп жоспарланған.
Әрбір атқарылып жатқан іске, құрылысқа немқұрайлы қарамай, атсалысқандарыңыз дұрыс. Өйткені жұмыс аяқталмай тұрып, сапасын түзеп алу маңызды. Емхана бойынша тұрғындардың арызы бойынша ГАСК (мемлекеттік сәулет-құрылыс бақылауы) тексеріп көрсін. Себебі құрылыс заңнамасы бұзылса, ғимараттың сапасына әсер етеді, - деді Өскемен қаласының әкімі Алмат Ақышов.