Өскемен мен ШҚО ШҚО әкімі су басу қаупі жоғары аймақтарды тексерді
Нұрымбет Сақтағанов жедел штаб құрамына кіретін бейінді ведомстволар қызметкерлерімен су тасқыны қаупі бар жерлерге мониторинг жүргізді
Құбылмалы ауа райына байланысты әсіресе өзен суын саған сайын қадағалап отыру керек, деп хабарлайды Устинка LIVE тілшісі.
ШҚО әкімінің баспасөз қызметі ақпараты бойынша, Марқакөлде Қалжыр өзенінің арнасын түзету және тазарту, су өткізгіш құбырларды орнату бойынша су тасқынына қарсы іс-шаралар жүргізіліп, Қалжыр және Марқакөл ауылдарына төнген қауіп азайды. 72 су өткізу құрылымдары, 6 көпір, сондай-ақ арықтар мен каналдар тазартылды. Бүгінгі мониторинг көрсеткендей, Қара Ертіс, Қалжыр өзендерінде мұз кептелістерін болдырмау үшін үш арнайы орында профилактикалық жарылыс жұмыстары жүргізіледі.
Орта Теректі, Лайлы және Төменгі Тайынты бөгеттері штаттық режимде жұмыс істеп тұр. Аймақтың барлық дерлік гидроқұрылымдары әлі мұз астында болса да, жарықтар анықталды. Сондықтан бұл нысандардың жағдайы сағат сайын бақылауды талап етеді.
Тарбағатайдың 6 елді мекені ішінде Тұғыл ауылында су тасқыны қаупі толығымен жойылды. Жаңауыл, Сарыөлең, Қарасу көл, Жетіарал, Маңырақта еріген су тасқыны қаупі төмендеді. Терісайрық өзені жағалауын нығайту жұмыстары жүргізілді. 182 су өткізу құрылымы, 9 көпір және 33 км су каналдары толығымен қар мен мұздан тазартылды.
Күршім ауданында жүргізілген тасқынға қарсы шаралар нәтижесінде 4 ауылда су басу қаупі толық жойылды. Күршім-Топтерек автожолындағы көпірге жөндеу жұмыстары жүргізілді. 441 су құрылымы топан суды өткізуге дайын болса, 19 көпір, сондай-ақ айналма арықтар мен каналдар тазартылды. Өзендердегі мұзды қопару үшін профилактикалық жарылыс жұмыстары жүргізілетін 2 учаске анықталды.
Облыстың барлық аудандарында көктемгі төтенше жағдайларды жоюға арналған күштер мен құралдар тобы бар. Аудан әкімдеріне үйлестірілген жұмыс жүргізуді тапсырдым. Су деңгейі және гидротехникалық құрылымдардың жай-күйі бақылауға алынады. Көлік қатынасын сақтау үшін әсіресе таулы жерлердегі жолдарға және көпірлерге ерекше назар аудару қажет. Басты міндет - адамдар мен инфрақұрылымды қорғау үшін барлық қажетті шараларды қабылдау, - деді Нұрымбет Сақтағанов.