Өскеменде "Абайдың Тоғжаны" сұлулық пен зияткерлік байқауы өтті

Оған мектептің жоғары сынып оқушылары мен 16-25 жас аралығындағы студенттер қатысты, деп хабарлайды Устинка LIVE тілшісі.

Байқау келесідей кезеңдерден тұрды:

• "Әсемпаз болма әрнеге" атты таныстыру кезеңінде қатысушылардың сыртқы келбет, тұлғалық қасиеттері және өзіне деген сенімділігі бағаланды;

• "Өнерге әркімнің-ақ бар таласы" шығармашылық кезеңінде Абайдың ойлы өлеңдері мен қара сөздерінен үзінді оқылды, Абайдың әндері орындалды;

• "Жасымда ғылым бар деп ескермедім" сұрақ-жауап кезеңінде қатысушыларға Абайдың шығармашылығы бойынша сұрақтар қойылды. Бұл кезеңде қатысушылардың интеллектуалды деңгейі, ой-өрісі және тапқырлығы анықталды.

• "Қақтаған ақ күмістей кең маңдайлы" дефиле немесе сән көрсету кезеңінде қатысушылар ұлттық киімдермен дефиле жасады, өздерінің жүріс-тұрысын, сахна мәдениетін көрсетті.

"Абайдың Тоғжаны" байқауы арқылы біз Абайдың мұрасын бағалап, жастарымызды ұлттық құндылықтарға деген сүйіспеншіліктерін арттыруға ықпал жасадық деп ойлаймыз, - дейді ұйымдастырушылар.

Байқауға "Үш қыздың анасы", "Қызыма хат" кітаптарының авторы, "НҰР САНА" білім беру орталығының және "Ханшайымдар академиясының" құрушысы, "Қазақ аналары - дәстүрге жол" республикалық қоғамдық бірлестігінің ШҚО филиалының төрайымы Нұрия Темірханова; ҚР "Мәдениет саласының үздігі", әнші, актриса Шолпан Лақаева және С. Аманжолов атындағы ШҚУ Қазақ, орыс филологиясы және журналистика кафедрасының оқытушысы Мархабат Байғабылова әділқазылық етіп, бұрымдыларды бағалады.

Қазылар алқасы сараптай келе қатысушыларға төмендегідей баға берді:

• "Көрермен көзайымы" номинациясын Герасимовка орта мектебінің педагог-ұйымтастырушысы Мерей Бағыдашай;

• "Тапқыр қыз" номинациясымен Өскемен қаласындағы №49 жалпы білім беретін мектептің 11-сынып оқушысы Жанель Жәнібекова;

• "Көрікті қыз" номинациясымен №42 орта мектебінің 11-сынып оқушысы Рината Шемпаева;

• "Дарынды қыз" номинациясымен Абай атындағы Шығыс қазақстан гуманитарлық колледжінің 1-курс студенті Аяулым Абылмажинова марапатталды.

• 3-орын: Абай атындағы Шығыс Қазақстан гуманитарлық колледжінің 4-курс студенті - Шұғыла Нұрланқызы

• 2-орын: Ахмер орта мектебінің 11-сынып оқушысы - Іңкәр Ақиқатқызы

• 1-орын: Қалжыр орта мектебінің 10-сынып оқушысы - Зарина Кульчарова

• Бас жүлде: Қазақстан-Американдық еркін университетінің 3-курс студенті - Іңкәр Серік

Байқау жеңімпаздары ақшалай сыйлықтармен және қаламыздағы сұлулық салондарының қызметі ұсынылған сертификаттармен марапатталды.