Өскемен мен ШҚО ШҚО-да жергілікті бюджетке 219,6 млрд теңге түскен
ШҚО мемлекеттік кірістер департаменті 2024 жылғы қызметінің қорытындыларын шығарды
Былтыр жергілікті бюджетке түскен нақты түсімдер 219,6 млрд теңгені құрады, бұл жоспарланған көрсеткіштен 6,2 млрд теңгеге артық, деп хабарлайды Устинка LIVE тілшісі.
Департамент басшысының орынбасары Сайранқан Қабыш ұсынған ақпарат бойынша өткен жылмен салыстырғанда өсім қарқыны 123,2%-ды құрады. Ең үлкен түсімдер: жеке табыс салығы – 67,3 млрд теңге, жорпоративтік табыс салығы – 43,2 млрд теңге, әлеуметтік салық – 53,9 млрд теңге.
Департамент қызметінің маңызды бөлігі цифрлық технологияларды енгізу болды. Қазіргі уақытта 90,5% мемлекеттік қызмет автоматтандырылған, ал олардың 36-сы Электрондық үкімет порталында қолжетімді. Сонымен қатар, "Е-Salyq Azamat" және "e-Salyq Business" мобильді қосымшалары белсенді дамып келеді. Бұл сервистер азаматтар мен кәсіпкерлерге қызметтерді ыңғайлы пайдалануға және салық есептілігін тапсыруға мүмкіндік береді, – деп атап өтті Сайранқан Қабыш.
2025 жылдан бастап жаңа ақпараттық жүйе – СӘИЖ енгізіледі. Ол қолданыстағы 7 жүйені алмастырып, мемлекеттік қызмет көрсету процестерін айтарлықтай жеделдетеді.
Сондай-ақ, ыңғайлы сервистерді енгізуге ерекше назар аударылады. Енді азаматтар салықтар, шоттардың бұғатталуы және тіпті жеке тұлғалардың банкроттығы туралы жедел ақпаратты Salygbot Telegram-боты арқылы ала алады. 2024 жылдың қазан айынан бастап "Кеден мәселелері бойынша жедел көмек көрсету" жаңа сервисі іске қосылды.
Осы орайда айта кеткен жөн, 2024 жылға көлік салығын төлеу мерзімі 2025 жылдың 1 сәуірінде аяқталады. Салық сомасын "e-Salyq Azamat" мобильді қосымшасы немесе KGD веб-порталы арқылы есептеуге болады.