Өскемен мен ШҚО Өскеменде "Ес-аға" фототілшілер клубы ашылды
Өскеменде А.С. Пушкин атындағы облыстық кітапханада "Ес-аға" фототілшілер клубының ашылу салтанаты өтті
"Ес-аға" клубы өмірі облысқа белгілі фотограф Есімхан Орынбаевтың 70 жылдық мерейтойына орай ұйымдастырылды, деп хабарлайды Устинка LIVE тілшісі.
Клуб Қазақстан Журналистер одағының ШҚО филиалының төрағасы, "Егемен Қазақстан" газетінің облыстағы меншікті тілшісі Мерей Қайнарұлының жетекшілігімен жұмыс істейтін болады.
Клубтың мақсаты болашақта фототілші болуға ынта-ықыласы бар тұрғындарға өз қабілеттерін жетілдіруге мүмкіндік беру. Фотожурналистикаға бейімі бар адамдарға фотопортрет, пейзаж, фоторепортаж, фотоочерк және тағы басқа түсірудің тәсілдерін үйрету, шеберліктерін шыңдау. Клубта арнайы жоспар құрылып, аптасына бір рет дәріс берілетін болады.
Сонымен қатар, ашылу салтанатына Есімхан Орынбаевтың қызы Әсел Есімханқызы, әріптестері, достары, кітапхананың тұрақты оқырмандары мен студенттер қатысты. Айтмұхамбет Қасымов, Әлібек Қаңтарбаев, Уәлихан Тоқпатаев белгілі журналистер және өзге де қонақтар жылы лебіздерін білдіріп, Есімхан Орынбаев туралы естеліктерімен бөлісті.