Өскеменде қай жерден пиротехника сатып алуға рұқсат етілген?

Жаңажылдық мерекеде пиротехниканы пайдалану кезінде қауіпсіздік шаралары сақталмайтындықтан жиі өрт шығып, оқыс оқиалар орын алады, деп хабарлайды Устинка LIVE тілшісі.

ШҚО ТЖД мамандары пиротехниканы арнайы рұқсат етілген орындардан сатып алып, қауіпсіздік ережелерін естен шығармауды ескертті.

Пиротехникалық заттар өрт қауіпсіздік ережелері толық сақталған, күн сәулесі мен жауын-шашын тимейтін орындарда сатылуы керек, - дейді ШҚО ТЖД мемлекеттік өрт бақылау басқармасының бастығы Нұржан Өміржанов. – Мереке қарсаңында өрт сөндірушілер мен полиция қызметкерлері пиротехника заңсыз сатылмауы үшін рейд жүргізеді.

ШҚО ТЖД пиротехникалық өнімдерді сатып алу кезінде олардың сақтау және сату мерзіміне назар аударуды ескертеді. Егер өнімнің мерзімі өтіп кеткен болса, оны қолдануға болмайды. Отшашуды ғимараттар мен құрылыс нысандарынан 50 метр қашықта ату керек және автотұраққа жақын жерде атуға болмайды. Желді күні пиротехниканы пайдалануға болмайды.

Қазіргі уақытта облыста пиротехникалық өнімдерді сатуға рұқсат алған 4 ұйым бар. Оның екеуі Өскемен қаласында ("Ұлан" ЖШС, "СТиК" ЖШС) және екеуі Алтай ауданында ("Алтай Салют" ЖШС, "Алтай Уют" ЖШС).

Өскемен қаласында:

• "Дос-Нар" СҮ (Виноградова көшесі, 17 а)
• "Самал" СҮ (Бажов көшесі, 331/1)
• "Оптовый" базары (Мыза көшесі, 4)
• "Колос" СҮ (Әуезов көшесі, 15)
• "METRO" СҮ (Сатпаев даңғылы, 76/2)
• "Магнум" СҮ (Жібек жолы көшесі, 1)
• "АДК" СҮ (Бажов көшесі, 110)

Алтай қаласында:

• Первомай көшесі, 23/2
• Геологиялық көшесі, 42

Жаңа жыл қарсаңында 50 қызметкерден тұратын 15 мобильді топ құрылды.

Облыс бойынша осы уақытқа дейін 189 рейд жүргізіліп, пиротехникалық өнімдерді сату кезінде ереже бұзушылықтар анықталды. Глубокое және Ұлан аудандарында 29 пиротехникалық зат тәркіленді. Пиротехникалық өнімдердің сертификаты жоқ болса, ҚР Әкімшілік құқық бұзушылық туралы кодексінің 196 және 483-баптарына сәйкес айыппұл салынады. Сонымен қатар, 436-бап бойынша жұмыс күндері сағат 23.00-ден кейін отшашу атқандарға 5 АЕК көлемінде айыппұл салынады. Тек жаңа жыл түні, яғни 2024 жылдың 31 желтоқсанынан 2025 жылдың 1 қаңтарына дейін бұл ереже қолданылмайтынын ескертеміз, - деді ШҚО ПД өкілдері.