Өскемен мен ШҚО Құлынжон ауылындағы мектеп заманауи білім беру орталығына айналды
ШҚО-да "Ybyrai Mektebi" атауымен ауылдағы мектептерде білім мен техникалық жабдықты жақсарту бойынша жаңа жоба жұмыс істей бастады
Финляндия және Сингапур моделіне негізделген бағдарлама бірінші болып шығыстағы Самар ауданы Құлынжон ауылындағы орта мектепке енгізілген, деп хабарлайды Устинка LIVE тілшісі.
Құлынжон мектебі 1966 жылы салынған. Мұғалім жетіспеушілігі, материалдық базаның және оқу жағдайының жоқтығынан осыдан екі жыл бұрын мектеп жабылуға шақ тұрған. Алайда 2022 жылы осы ауылдың тумасы, кәсіпкер Айдын Рахымбаев мектепті жаңғырту мен қайта жөндеуге 2 миллион доллар инвестиция құйды.
Aidyn & Anar Rakhimbayev Foundation қоры американдық университеттердің бірімен бірлесіп жүзеге асыратын "Ybyrai Mektebi" жобасы екі жыл ішінде кәдімгі ауыл мектебін заманауи білім беру орталығына айналдырды.
Нәтижесінде:
- Магистр дәрежесі бар мұғалімдердің үлесі 15%-дан 25%-ға дейін артты
- Түлектердің ҰБТ-дағы орташа балы 53-тен 102-ге дейін көтерілді
- 15 үйірме бар (робототехника, медиасауаттылық және гидропоника, т.б.)
Мектеп толықтай заманауи талаптарға сай жабдықталған. Бұл жобаның ерекшелігі - ата-аналар сабаққа, үйірмелерге емін-еркін қатыса алады. Білім беру тұжырымдамасында нөлден бастап 6-сыныпқа дейінгі оқушыларды бастауыш мектеп ретінде қарастырады. Негізгі мақсат – үздіксіз білімді тәрбиемен ұштастыра беру.
Шығыс Қазақстан облысының әкімі Ермек Көшербаев пен кәсіпкер Айдын Рахымбаев болашақта салынатын пансионат пен спорт алаңының орнына "уақыт капсуласын" салды.
Президенттің тапсырмасына сәйкес, Үкімет еліміз бойынша жайлы мектептер салып жатыр. Өз кезегінде, кәсіпкерлер бұл бастамаларды қолдауда. Бүгін меценат Айдын Рахымбаев өзінің туған ауылына келіп, белсенді түрде қолдау көрсетуде. Бұл жерде біз жаңа білім беру әдістерімен оқытатын құзырет орталығын құратын боламыз. Балалар мен мұғалімдер ғана емес, ата-аналар да бұл процеске қатысады, – деді облыс әкімі Ермек Көшербаев.
"Уақыт капсуласын" салу рәсімі мектепті дамытудың екінші кезеңінің басталу символына айналды. Жақын арада мұнда спорт алаңы мен пансионат салынып, мектеп толыққанды білім беру кешеніне айналады