Өскемен мен ШҚО Өскемендегі депутаттар экологтармен бірге рейдке шықты
Бүгін де облыс орталығында қолайсыз метеорологиялық жағдай сақталуда
Бүгін Шығыс Қазақстан облысы экология департаментінің өкілдері қоғам белсенділері, облыстық мәслихат депутаттарымен бірлесіп экологиялық рейдке шықты, деп хабарлайды Устинка LIVE тілшісі.
Облыс орталығындағы өнеркәсіп ошақтарының жұмысы және олардың ауаның тазалығына әсері жергілікті билік органдарының жіті бақылауында екені белгілі. Бұл орайда аймақ басшысы Ермек Көшербаев экологтардан, сарапшылардан, қоғам белсенділері мен метеорологтардан арнайы тексеру тобын құрған болатын.
Бүгін осы арнайы топтың экологиялық рейді "Май" АҚ-ның санитарлық-қорғау аймағында басталып, мұнда аспаптық өлшемдер жасалды, - деп хабарлады ШҚО ішкі саясат басқармасы. - Нәтижесінде хлордың шекті рұқсат етілген концентрациясының екі есе асып тұрғандығы анықталды. Сондай-ақ, "Қазгидромет" РМК ШҚО филиалының мәліметі бойынша, автоматты өлшеу станциясында көмірқышқыл газының шекті рұқсат етілген концентрациясының мөлшерден асуы анықталды. Өзге көрсеткіштер қалыпты нормадан асқан жоқ.
ШҚО экология департаменті басшысының міндетін атқарушы Азамат Тауырбековтың айтуынша, Өскеменде 20 қарашадан бері қолайсыз метеорологиялық жағдай қалыптасып отыр. Осыған байланысты қалада бірнеше күн бойы желсіз болып, ауа тұманданып тұр.
"Қазгидромет" РМК ШҚО филиалы басшысының айтуынша, Өскеменде қолайсыз ауа райы қараша айының соңына дейін сақталады.
Осы орайда айта кеткен жөн, кеше әлеуметтік желіде "Казцинк" ЖШС-да апат болды деген ақпарат тараған болатын. БАҚ өкілдері экологиялық және метеорологиялық қызметтермен бірге "Қазмырыш" ЖШС кәсіпорнының өндірістік алаңында рейд жүргізуде.
"Қазмырыш" ЖШС бас экологы Қазтай Такеев тексеру тобына технологиялық процесс үшін қолданылатын суды салқындататын "Lavalin" қондырғысын көрсетті. Оның айтуынша, бұл ауаға шығарылатын зиянды қалдықтар емес, тек осы судан шығатын бу.
