Қорғаныс министрлігі ШҚО-ның 5 сарбазын марапаттады

Екі мыңнан астам мерзімді әскерде жүрген сарбаздар су тасқыны салдарын жоюға, елді-мекендердің жағалауларын нығайтуға, техногендік бөгеттер тұрғызуға және құтқару операцияларына қатысты, деп хабарлайды Устинка LIVE тілшісі.

Биыл көктемде Батыс Қазақстан өңірін су басып, талай ауыл-аймақ, мыңдаған үйлер судың астында қалды. Осы су тасқынына қарсы іс-шараларға қатысқан қатардағы сарбаздардың еңбегі еленіп, оларға Қорғаныс министрінің Жарлығымен марапаттар тағайындалды.

Солардың қатарында шығысқазақстандық Чингиз Балтыбаев, Никита Сухосенко, Бекзат Темірхан, Сымбат Кеңесов, Данил Баршин, Илья Воробьев болды.

Біздің сарбаздар, Отанын қорғаушы ер азаматтарымыз жоғары моральдық қасиеттерді, төзімділік пен адалдықты көрсетті. Олардың Отанымыздың игілігі үшін жасаған еңбегі ең жоғары бағаға лайық, - деді ШҚО Департамент бастығының орынбасары басқарма бастығының міндетін уақытша атқарушы подполковник Айдос Майлыбаев.

Марпаттау рәсімі Өскемен қаласындағы №24 мектеп қабырғасында мектеп оқушылары мен ата-аналардың қатысуымен өтті. Бұл оқушыларды тәрбиелеуде, Отанға деген құрметті арттыруда және әскери қызметшілердің мәртебесін көтеруде маңызды.

Бұл мен үшін үлкен мәртебе. Мұндай марапаттауды мен күтпеген едім. Көктемгі су тасқыны еліміз үшін қиын кезең болды. Сол кезде біздің мойнымызға артылған жүк жеңіл болмады. Бірақ біз қаншалықты маңызды әрі жауапты іс атқарып жүргенімізді түсіндік. Оның үстіне жұмыс күшін қажет еткен өңірге өз ықыласымызбен бардық. Біздің күш-жігеріміздің еленіп, ескеріліп жатқаны қуантады, - деді запастағы қатардағы жауынгер Чингиз Балтыбаев.

Азаматтық өмірге оралған жас сарбаздарға әскери күштердің дәстүрі бойынша Қорғаныс министрлігінен естелік сыйлық - қол сағаттар табысталды.

Бұл салтанатты шара әскери қызмет тек міндет емес, сонымен бірге үлкен абырой екенін және сарбаздардың еңбегі әрқашан лайықты бағасын алатынын көрсетті.