Әлем Қазақстандықтар РФ-ға кірерде есірткіге тәуелділіктің және АИТВ-ның жоқтығын растауы керек
Ресей Федерациясындағы ҚР Елшілігінде 90 күннен астам мерзімге Ресей Федерациясына кірудің жаңа ережелері туралы айтылды
29 желтоқсаннан бастап Ресейге үш айдан астам мерзімге келген Қазақстан азаматтары нашақорлықтың және АИТВ-ны қоса алғанда, жұқпалы аурулардың жоқтығын растауы тиіс, деп хабарлайды Устинка LIVE тілшісі. Келушілер ресейлік медициналық мекемелерде міндетті медициналық тексеруден өтіп, ішкі істер министрлігінің жергілікті аумақтық органына анықтамаларды ұсынады.
Сондай-ақ, қазақстандықтарға міндетті мемлекеттік дактилоскопиялық тіркеуден өту және суретке түсу қажет, содан кейін ІІМ аумақтық органдары оларға тиісті құжат береді, - деп хабарлайды ҚР РФ-дағы Елшілігінің сайтында. - Ресейге еңбек қызметі мақсатында келген жағдайда жоғарыда көрсетілген рәсімдер келген күннен бастап 30 күн ішінде, басқа мақсаттарда – 90 күн ішінде өтуі керек.
Медициналық анықтамалардың қолданылу мерзімі аяқталғаннан кейін қазақстандықтар 30 күн ішінде медициналық куәландырудан қайта өтуге және жаңа құжаттарды ІІМ аумақтық органына не мемлекеттік және муниципалдық қызметтердің бірыңғай порталын пайдалана отырып, электрондық құжат нысанында не басқармаға бағынышты кәсіпорын немесе уәкілетті ұйым арқылы ұсынуға міндетті.
Жоғарыда аталған талаптар орындалмаған жағдайда Ресейде болу мерзімі қысқартылуы мүмкін.
