Қазақстан мен Ауғанстан әскери ынтымақтастық туралы келісімге қол қойды

Қазақстанның Қорғаныс министрі генерал-лейтенант Нұрлан Ермекбаев пен Ауғанстан Президентінің Ұлттық қауіпсіздік жөніндегі кеңесшісі Хамдулла Мохиб жұма күні Нұр-Сұлтанда екі ел арасындағы әскери ынтымақтастық туралы келісімге қол қойды, деп хабарлады Қорғаныс министрлігінің баспасөз қызметі.

- Құжат Ауғанстан Ислам Республикасы Президентінің ұлттық қауіпсіздік жөніндегі кеңесшісі Мохаммад Атмардың 2017 жылғы шілдеде Қазақстан Республикасына сапары барысында қол жеткізілген келісімдерге сәйкес әзірленді, - делінген Қорғаныс министрлігінің хабарламасында.

Кездесуде Ауғанстан төңірегіндегі ахуал жөніндегі мәселелер талқыланды. Генерал-лейтенант Нұрлан Ермекбаев еліміз Ауғанстандағы республикалық демократиялық жүйенің сақталуын қолдайтынын атап өтті. Министр шетел әскерлерінің шығарылуы елдегі жағдайды тұрақтандыруға негіз болады, сондай-ақ қақтығысушы тараптардың келіспеушіліктерін жою үшін ымыралы шешімдер табылады деген үмітін білдірді.