Әлем АҚШ босқындарды қабылдайды, бірақ тексеруді күшейтеді
АҚШ қауіпсіздігіне қауіп төндіре алатын елдердің босқындары тиянақты тексеруге ілінеді, - деп хабарлайды ішкі қауіпсіздік министрлігі
АҚШ босқындарды қабылдау бағдарламасын қайта іске қосады. Бірақ 11 елдің мигранттарын тексеруді күшейтеді. Доналдь Трамптың мұндай бұйрығы сейсенбі күні Ақ үйдің ресми сайтында жарияланды. Айта кету керек, бағдарламаның жұмысы 120 күнге тоқтатылған болатын.
Қаулыда 11 елдің аты аталмаған. Жаңа ережелердің жұмысы 90 күнге шектелген. Ішкі қауіпсіздік министрлігінің мәлімдемесінде АҚШ қауіпсіздігіне қауіп төндіре алатын елдердің босқындары тиянақты тексеруге ілінетіні айтылған.
Трамп өзінің президенттік кампаниясы барысында босқындарды қабылдау бағдарламасын тоқтататыны туралы айтқан. Американдық Pew Research зерттеу орталығының хабарлауынша, ағымдағы жылдың 9 айында АҚШ 28 мың босқынды қабылдаған.
