Әлем «Каспер Лабораториясы» хакерлермен әріптес болды деген айыптауды жоққа шығарды
Америка басылымдары ресейлік хакерлердің Каспер антивирусын пайдаланып тыңшылық әрекеттер жасады деп жазған болатын.
Ал Мәскеуде орналасқан «Каспер Лабораториясы» халықаралық компаниясының басшылары америкалық басылымдардың бұл айыптауын жоққа шығарып:
- Компания кибертыңшылық жасауға қолдау танытқан емес, танытпайды да, - деді компания өкілдері Твиттер желісінде.
Компания басшылары бұған дейін де АҚШ үкіметімен байланыс орнатып, кибершабуыл саласындағы мәселелерді шешуге ниет білдірген болатын.
Кибершабуыл жасаушылардың «Каспер Лабораториясы» бағдарламасын пайдалана отырып АҚШ-тың ұлттық қауіпсіздік агенттігінің жеке мұрағатына еніп ақпарат ұрлағанын Израиль елінің арнайы қызмет мамандары анықтаған. Израиль арнайы қызметі 2015 жылы да антивирус бағдарламасының ішкі базасына кіріп, Ұлттық қауіпсіздік агенттігінің ақпараттары жинақталғанын байқаған.