Итальяндық сот ми ісігіне ұялы телефонның әсері бар деп тапты

Il Messagero хабарлағандай, күні бойы бірнеше сағаттап ұялы телефонмен сөйлескендіктен миында қатерсіз ісік пайда болған 57 жасар Роберто Ромеоның ісін қараған сот оған зиянды жағдайда жұмыс істеп отырғандығы үшін үкіметтік зейнетақы тағайындалу керек деген шешім шығарды.

Роберто Ромео жергілікті компаниялардың бірінің басшысы. Ол қызмет бабымен 15 жыл бойы күніне үш сағаттан ұялы телефонмен сөйлесуге мәжбүр. Арызданушының сөзіне сүйенсек, одан басқа амалы қалмаған. Өйткені әріптестерімен маңызды сұрақтарды талқылау үшін көлікте де, үйде де үнемі ұялы телефон арқылы байланысып отыруға тура келеді.

Сот шешімі бойынша зейнетақыны итальяндық Жұмыстағы қайғылы жағдайлардан сақтандыру мемлекеттік институты төлеуі керек. Алайда институт сот шешіміне шағым түсіруіне де болады.