Әлем Қазақстанда алаяқтық жасады деген күдікті Швециядан экстрадицияланды
Оған кәсіпкерді қорқытып, ақша бопсалады деген айып тағылған
Халықаралық іздеуде жүрген күдікті Швециядан табылған, деп хабарлайды Устинка LIVE ҚР Бас прокуратурасының ақпаратына сүйеніп.
2019 жылдың тамыз айында Алматыда өздерін Ұлттық қауіпсіздік органдарының қызметкерлеріміз деп таныстырған бір топ адам кәсіпкер ісіне тексеру жүргізіп, қылмыстық жауаптылыққа тартамыз деген желеумен 30 мың АҚШ доллары көлеміндегі қаражатты жымқырмақ болған, - делінген ақпаратта.
Олардың әрекеттерінің жолын кесу кезінде біреуі қылмыстық қудалау органдарынан жасырынып үлгерген, сондықтан оған халықаралық іздеу жарияланды.
Кейін Қазақстан тарапының өтініші бойынша оны Швеция Корольдігінің құқық қорғау органдары Стокгольм қаласында ұстады.
ҚР Бас прокуратурасы мен ІІМ Интерпол қызметкерлері, Сыртқы істер министрлігінің қолдауымен күдікті Қазақстанға жеткізілді.
Қазіргі уақытта ол Астана қаласының тергеу изоляторына қамалды.
Жасаған қылмысы үшін оның мүлкі тәркіленіп, 5 жылдан 10 жылға дейін бас бостандығынан айыру жазасына кесілуі мүмкін.
