Әлем Түркияда қазақтың бір отбасы апатқа ұшырап, қызы мен анасы көз жұмды
Отағасы реанимацияда, ал 2014 жылғы ұл бала ауруханада жатыр
Сыртқы істер министрлігінің баспасөз қызметі мәлімдегендей, қазақстандық отбасы Түркияға саяхаттап барған, деп хабарлады ҚазАқпарат.
3 қыркүйекте Аланияда жол-көлік оқиғасы болып, қазақстандық отбасы зардап шекті. Жол апатынан оқиға орнында 1989 жылы туған әйел мен оның 2 жасар қызы қайтыс болды. Отағасы (1986 жылы туған) ауыр жағдайда реанимацияда жатыр. 2014 жылы туған ұлы да ауруханада, оның денсаулығына аса қауіп төнбеген, - делінген СІМ хабарламасында.
Ақпаратта айтылғандай, қазақстандық дипломаттар апатқа ұшыраған отбасының туыстарымен байланыста отыр.
Аталған отбасыға барлық қажетті консулдық-құқықтық көмек көрсетіледі. Бұл отбасы Түркияда турист ретінде болды және бүгін елге оралуы керек еді, - дейді ведомстводан.