Әлем Азия чемпионаты: Назым Қызайбай ширек финалға өтті
Азия чемпионатында Назым Қызайбай алғашқы жеңісіне қол жеткізді
Назым Қызайбай 50 келіге дейінгі салмақта таиландтық Раксат Чутхаматпен жұдырықтасты, деп хабарлайды Устинка LIVE тілшісі Қазақстан бокс федерациясына сілтеме жасап.
Иорданияның Амман қаласында бокстан Азия чемпионаты өтіп жатыр. Чемпионатта Серік Теміржанов пен Сәкен Бибосынов жеңіске жетті.
Ал екі дүркін әлем чемпионы Назым Қызайбай 50 келіге дейінгі салмақта таиландтық Раксат Чутхаматпен жұдырықтасты. Жекпе-жек өте тартысты өтіп, төрешілер жеңісті 3:2 есебімен қазақстандық боксшыға берді.
Осылайша, Назым ширек финалға жолдама алды. Енді Назым келесі кезеңде моңғолиялық былғары қолғап шебері Балсангийн Менгенсаранмен жұдырықтасады.
Азия біріншілігінде әйелдер арасында, сондай-ақ Алуа Балқыбекова (48 кг), Жазира Орақбаева (52 кг), Жайна Шекербекова (54 кг), Карина Ибрагимова (57 кг), Римма Волосенко (60 кг), Аида Әбікеева (63 кг), Мәдина Нұршаева (66 кг), Дариға Шәкімова (70 кг), Валентина Хальзова (75 кг), Гүлсая Ержан (81 кг) және Ләззат Күнгейбаева (+81 кг) ел намысын қорғайды.
