Ұшақта теңдеу шешіп отырған профессорды көршісі террорист деп ойлаған

Пенсильвания университетінің экономика профессоры Гидо Менцио Канададағы Куинс университетіне ұшуы тиіс болатын. Қасында отырған әйел профессордың қойын дәптеріне белгісіз жазбалар жазып отырғанын көріп, төбе шашы тік тұрған, деп хабарлайды «24.kz телеарнасының сайты».

 Іле стюардессаны шақыртып, қасындағы көршісінің террорист болуы мүмкін екендігін айтқан. Бұдан кейін рейс кейінге қалдырылып, Менционы тергеу үшін тәртіп сақшылары ұшақтан алып шыққан. Профессор қойын дәптерін көрсетіп, теңдеу шешіп отырғанын айтып ақталған. Оқиғаның ақ-қарасы анықталғаннан кейін ұшаққа оралып, өз орнына жайғасуына рұқсат берілді. 

Washington Post басылымы ұшақтың жоспарланған уақыттан 2 сағатқа кеш ұшып шыққандығын жазады. Ал профессордың көршісі бортқа қайтып оралмапты.