Спорт Сурдлимпиадалық ойындардың күміс жүлдегері Өскеменге оралды
Түркияда өткен XXIIІ Сурдлимпиадалық ойындарда дзюдодан күміс медаль еншілеген Шаяхмет Қанапиянов Өскемен қаласына оралды
Спортшыны жанкүйерлері мен қала тұрғындары құшақ жая қарсы алды.
Шаяхмет Қанапиянов 66 кг салмақ дәрежесі бойынша бірнеше кездесу өткізген. Соңғы кездесуде ресейлік спортшыдан жеңіліп, күміс медальға ие болды.
– Бұл тек менің ғана емес, жаттықтырушыларым мен қолдаушыларымның жетістігі деп білемін. Соңғы кездесуде аздап қобалжып кеттім. Оның үстіне уақыт та тығыз болды. Дегенмен бұл менің бірінші үлкен жетістігім. Мұнымен тоқталып қалмақ емеспін, – деді спортшы.
Айта кетсек, жазғы сурдлимпиадалық ойындар 1924 жылдан бері өткізіледі. Онда тек есту мүшесінде мүкісі бар спортшылар қатысады. Параолимпиадалық ойындардан басты ерекшелігі, мұнда спортшылар арнайы әзірленген емес, Олимпиада ойындарына арналған алаңда бақ сынасады.
