Қазақстан құрамасының Риодағы 15 тамыз күнгі жарыстарының қорытындысы

Олимпиаданың оныншы жарыс күні грек-рим күресінен 130 келіге дейінгілер арасындағы бәсеке өтті. Бүкіл ел үміт артқан негізгі балуанымыз Нұрмахан Тінәлиев алғашқы айналымда-ақ жарыстан шығып қалды. Ол бірінші кездесуінде германиялық Эдуард Поппқа жол берді. Осылайша 28 жастағы жерлесіміз үшін Рио Олимпиадасы сәтсіз аяқталды.

Айта кетейік, осының алдында 59 келіге дейінгілер арасында Алмат Кебіспаев пен 75 келіге дейінгілер арасында Досжан Қартықов та бозкілемдегі бәсекелерін осы іріктеу сындарында тоқтатқан болатын.

Ал апалы-сіңлілі Немичтер үшін де Олимпиада сәтсіз аяқталды. Синхронды жүзуден ел намысын Екатерина және Александра есімді қос ару қорғаған. Аталған спорт түрінен Қазақстаннан жолдама алған да солар. Бірақ, іріктеу сынында олардың жолы болмады. Техникалық бағдарлама қорытындысы бойынша 162.86 ұпай жинап, 24 жұптың арасынан 15-орынға тұрақтады. Ал финалға тек алғашқы 12-сі өтеді.

Бұған қоса Қазақстан қоржынындағы тағы бір жалғыз жолдама велотректен болған. Жерлесіміз Артем Захаров омниум бәсекесі бойынша сынға түсіп, жалпы есептің тек 10-сатысына орналасты. Қазақстандық спортшының жинаған ұпайы – 111. Ал Олимпиада алтынын италиялық Элиа Вивиани жеңіп алды. Оның ұпайы – 207.