Науқас бала қар құрсауында қалды

Қатты соққан боранның кесірінен жолда қалған жедел жәрдем көлігіне құтқарушылар көмегі қажет болған. Өйткені жедел жәрдем көлігінде науқас бала болған.
- Шұғыл көмек көрсету үшін құтқарушылар тобы оқиға орнына жетіп, баланы Семей қаласына жеткізген, - деп хабарлайды ШҚО ТЖД баспасөз қызметі. – Ал 23 қаңтарда Жарқын ауылынан құтқарушылар тағы екі баланы тасымалдады.

Сонымен қатар, ШҚО ТЖД мәліметтері бойынша 12.00-ден бастап жабық болған Жезкент-Бородулиха тас жолы бойында Жезкенттен тоғыз шақырым жерде бір көлік қар құрсауында қалды. Арнайы көлік жолды жарып өте алмағандықтан, құтқарушылар бір шақырым жерді жаяу жүріп өтуге мәжбүр болған. Осылайша ӨБ-52 қызметкерлері төрт ересек адам мен бір баланы қар құрсауынан алып шықты. Тағы осындай оқиға Семей-Қайнар жолында да орын алып, құтқарушылар үш адамды алып шықты. Семей қаласынан қырық шақырым жерде олардың көлігі сынып қалған. Зардап шеккендер жоқ.