Оқиғалар Қостанайда Ұлттық гвардия сарбаздары бес адамды өлімнен алып қалды
Өртеніп жатқан үйдің ас үйінде газ баллоны болған
Қостанай облысы Құсмұрын ауылында ұландық жауынгер үш баланы, олардың әжесі мен анасын өрттен құтқарды, деп хабарлайды ҚазАқпарат ХАА.
А.Калашникова есімді азаматшаның үйінде газ баллоны тесіліп, өрт тұтанған. Жалын шарпыған сәтте ас үйде А. Калашниковамен бірге оның анасы және үш баласы болған. Өрт лаулаған сайын газ баллонының дыбысы үдей түсті. Үй иесі тез арада балаларды үйден шығарды, ал анасы көмек сұрап көршілерге жүгіреді.
Алғашқы көмек қолын созған Ұлттық ұланның №6697 бөлімінің әскери қызметшісі, сержант Медет Балабиев болды. Ол қауіп-қатерге қарамастан өрт шарпыған ас үйге жүгіре кіріп, баллонды пештен ажыратып, сыртқа алып шыққан.