Парижде болған наразылықтың кесірінен жүз шақты адам жараланды

Сенбі күні өткен бейбіт шерудің соңы тәртіпсіздікке ұласып, полициямен бұрын-соңды болып көрмеген қақтығысқа ұласты, деп хабарлайды Францияның БАҚ өкілдері.

Француз телеарналарының хабарлауынша, "сары күрте кигендердің" сол күштері мен оң күштерінің арасында қақтығыс болып, оған көше бұзақылары мен мародер қашқындар қосылып, жаппай дүрбелең болған. Ойрандаушы топ көзге көрінген тәртіп сақшыларының барлығын сабап, Париж қаласының түкпір-түкпірінде қырғын салды.

БАҚ мәліметтеріне сәйкес, 110 адам жараланып, 270 адам қамауға алынған. Жараланған жандардың арасында 17 тәртіп сақшысы бар.

Бассыздар көшедегі көліктерді өртеп, Тюильри саябағының қоршауларын сындырып, Фобур Сент-Оноре көшесіндегі сауда дүкендерін қиратып кеткен.

Ал бүлік шығарудан бас тартқан "сары күрте кигендер" наразылық шеруге бейбіт түрде шыққанын әрі полициямен қақтығысқысы келмейтіндігін айтып өздерін ақтауға тырысуда.