Іздеудегі қазақстандық Максим Арышев Санкт-Петербургтегі терактта қаза тапты

- Ресей Федерациясының тергеу комитетінің берген ақпараты бойынша, осыған дейін іздеуде болған Қазақстан азаматы Максим Арышев 3 сәуір күні Санкт-Петербургте болған террористік жарылыстан кейін қаза тапқанын қайғымен хабарлаймыз, - деп хабарлады ІІМ өздерінің Facebook парақшасында.

ҚР ІІМ ақпаратына сәйкес, қазіргі уақытта Максим Арышевтің денесі Санкт-Петербург қаласындағы Екатерининская ауруханасында, ата-аналары баласының мәйітін таныды.

- Қазақстанның ІІМ мен қазақстандық дипломаттар Санкт-Петербургтегі Максим Арышевтың туғандарына барынша қолдау көрсетуге және оның денесін елге әкелуге көмектеседі. Максимнің туған-туыстарына және осы оқиғадан кейін жақындарын жоғалтқандардың қайғысына ортақтасамыз, - делінген хабарламада.

Осыған дейін бірқатар БАҚ-та қазақстандық азамат Санкт-Петербургтегі терактті ұйымдастырушы деген ақпарат тараған болатын. Қазақстан ІІМ мен ҰҚК бұл ақпаратты жоққа шығарды.

Қазақстан ІІМ баспасөз қызметінің басшысы Ануар Жайнаков дүйсенбі күні сағат 21.06-да Ирина Арышева Санкт-Петербургтегі Қазақстанның елшілігінің бас консулына хабарласып, жарылыстан кейін оның ұлы байланысқа шығуын тоқтатқанын хабарлады. Арышев Максим Витальевич Санкт-Петербургтегі экономикалық университеттің 3-курс студенті еді.